Oil Palm Processing Unit Narmetta | తెలంగాణ రాష్ట్రం ఆయిల్ పామ్ సాగులో మరో చారిత్రాత్మక మైలురాయిని చేరుకోబోతోంది. సిద్ధిపేట జిల్లా నంగునూరు మండలం నర్మెట్ట గ్రామంలో సుమారు రూ. 300 కోట్ల అంచనా వ్యయంతో నిర్మించిన ఆధునిక ఆయిల్ పామ్ ప్రాసెసింగ్ ఫ్యాక్టరీని ఈ నెల 22వ తేదీన ముఖ్యమంత్రి రేవంత్రెడ్డి చేతుల మీదుగా ప్రారంభించనున్నారు.

రాష్ట్రంలో ఆయిల్ పామ్ సాగు అభివృద్ధి దిశగా మరో కీలక అడుగు పడుతోందని రాష్ట్ర వ్యవసాయ, మార్కెటింగ్, సహకార, చేనేత & వస్త్ర శాఖల మంత్రి తుమ్మల నాగేశ్వరరావు (Tummala Nageswara Rao) తెలిపారు. సిద్ధిపేట జిల్లాలోని నంగునూరు మండలం నర్మెట్ట గ్రామంలో నిర్మించిన ఆధునిక ఆయిల్ పామ్ ప్రాసెసింగ్ యూనిట్‌ను ఈ నెల 22వ తేదీన ముఖ్యమంత్రి చేతుల మీదుగా ఘనంగా ప్రారంభించనున్నట్లు మంత్రి తుమ్మల పేర్కొన్నారు.

Table of Contents

Oil Palm Processing Unit : నర్మెట్ట యూనిట్ ప్రత్యేకతలు:

రాష్ట్ర వ్యవసాయ శాఖ మంత్రి తుమ్మల నాగేశ్వరరావు అధికారులతో నిర్వహించిన సమీక్షలో ఈ ప్రాజెక్ట్ వివరాలను వెల్లడించారు:

సామర్థ్యం: ప్రారంభ దశలో గంటకు 30 టన్నుల (30 TPH) సామర్థ్యంతో పని చేసే ఈ యూనిట్‌ను, భవిష్యత్తులో గంటకు 120 టన్నుల వరకు విస్తరించేలా డిజైన్ చేశారు.
ఆధునిక సాంకేతికత: ఈ ప్లాంట్‌లో అత్యాధునిక టెక్నాలజీని వాడటం వల్ల నూనె నాణ్యత పెరగడంతో పాటు రైతులకు మెరుగైన మద్దతు ధర లభిస్తుంది.
రైతులకు ప్రయోజనం: ఈ యూనిట్ ప్రారంభంతో సిద్ధిపేట చుట్టుపక్కల జిల్లాల్లో ఆయిల్ పామ్ సాగు చేస్తున్న రైతులకు ప్రాసెసింగ్, నిల్వ, మార్కెటింగ్ సౌకర్యాలు మరింత సులభంగా అందుబాటులోకి రానున్నాయని మంత్రి తెలిపారు.
Agri Business : రైతులు తమ పంటలను నేరుగా ఈ ప్రాసెసింగ్ యూనిట్‌కు తీసుకువచ్చి ప్రాసెస్ చేయించుకునే అవకాశం ఉంటుందని చెప్పారు. ఆధునిక సాంకేతికతతో నూనె తయారీ జరగడం వల్ల నాణ్యత మెరుగుపడటంతో పాటు రైతులకు మెరుగైన ధరలు లభించే అవకాశం ఉంటుందని మంత్రి వివరించారు.

మూడు రోజుల పాటు ‘రైతు మేళా’ (మార్చి 20 – 22):

ఈ ప్రారంభోత్సవ వేడుకలను పురస్కరించుకుని వ్యవసాయ, అనుబంధ శాఖల ఆధ్వర్యంలో మార్చి 20 నుండి 22 వరకు భారీ రైతు మేళాను (Rythu Mela) నిర్వహించనున్నారు. ఆయిల్ పామ్ సాగు విధానాలు, దిగుబడి పెంపు మార్గాలు, ప్రభుత్వ పథకాలపై నిపుణులు అవగాహన కల్పిస్తారు. ఆధునిక వ్యవసాయ యంత్రాలు, నూతన సాగు పద్ధతులపై వివిధ శాఖల స్టాళ్లను ఏర్పాటు చేయనున్నారు.

ఆయిల్ ఫెడ్ బలోపేతం:

ప్రస్తుతం భద్రాద్రి కొత్తగూడెం జిల్లాలో తెలంగాణ ఆయిల్ ఫెడ్ (Oil Fed) ఆధ్వర్యంలో రెండు మిల్లులు నడుస్తుండగా, నర్మెట్ట యూనిట్ అందుబాటులోకి రావడం వల్ల రాష్ట్రంలో ఆయిల్ పామ్ ప్రాసెసింగ్ సామర్థ్యం గణనీయంగా పెరుగుతుంది. ఇది రైతులకు సరైన మార్కెట్ అవకాశాలను కల్పిస్తూ వారి ఆర్థికాభివృద్ధికి తోడ్పడుతుందని మంత్రి ఆశాభావం వ్యక్తం చేశారు.