Rythu Nestham 89th Episode Telangana : తెలంగాణ రాష్ట్ర వ్యవసాయ శాఖ ఆధ్వర్యంలో రైతులకు సాగు మెళుకువలు, శాస్త్రీయ పరిజ్ఞానాన్ని అందించే “రైతు నేస్తం” కార్యక్రమం మరో కీలక ఘట్టానికి చేరుకుంది. రాష్ట్రవ్యాప్తంగా ఉన్న 1600 రైతు వేదికలలో వీడియో కాన్ఫరెన్స్ ద్వారా నిర్వహించే ఈ వినూత్న కార్యక్రమం, ఈ నెల 07-04-2026 (మంగళవారం) రోజున 89వ ఎపిసోడ్ను పూర్తి చేసుకోనుంది.
సమయం, వేదిక:
- తేదీ: 07 ఏప్రిల్ 2026, మంగళవారం.
- సమయం: ఉదయం 10:00 గంటల నుండి 11:00 గంటల వరకు.
- వేదిక: మీ గ్రామానికి దగ్గరలోని వీడియో కాన్ఫరెన్స్ సౌకర్యం ఉన్న రైతు వేదిక.
Rythu Nestham ఎపిసోడ్లో చర్చించబోయే ముఖ్య అంశాలు:
ఈ వారం నిర్వహించే 89వ ఎపిసోడ్లో ప్రధానంగా మూడు అంశాలపై నిపుణులు, రైతులు అవగాహన కల్పించనున్నారు:
- నానో యూరియా సాగు: నానో యూరియా వాడకం వల్ల కలిగే ప్రయోజనాలు, దిగుబడిపై దాని ప్రభావం గురించి వాడిన రైతుల ప్రత్యక్ష అనుభవాలు.
- ప్రకృతి వ్యవసాయం: రసాయన రహిత సాగు చేస్తున్న రైతుల విజయగాథలు, వారి సాగు పద్ధతులపై చర్చ.
- వానాకాలం వరి సాగు: రాబోయే వానాకాలం సీజన్కు అనువైన, సాగు చేయదగిన వరి సన్న రకాల గురించి ప్రొఫెసర్ జయశంకర్ తెలంగాణ వ్యవసాయ విశ్వవిద్యాలయ వరి శాస్త్రవేత్తలు వివరించనున్నారు.
నిపుణులతో నేరుగా చర్చ:
ఈ కార్యక్రమంలో కేవలం సాగు పద్ధతులే కాకుండా, ఉద్యాన, పశు సంవర్ధక, మరియు మార్కెటింగ్ శాఖల అధికారులు, శాస్త్రవేత్తలు రాష్ట్రస్థాయి నుండి పాల్గొంటారు. రైతులు తమ సాగులో ఎదురవుతున్న సందేహాలను నేరుగా నిపుణులతో చర్చించి నివృత్తి చేసుకోవచ్చు.
వ్యవసాయ సంచాలకుల పిలుపు: తెలంగాణ రాష్ట్ర వ్యవసాయ డైరెక్టర్ ఈ కార్యక్రమం గురించి స్పందిస్తూ.. రైతులందరూ తమకు సమీపంలోని రైతు వేదికలకు ఉదయం 10 గంటలకే చేరుకుని, ఈ అవకాశాన్ని సద్వినియోగం చేసుకోవాలని కోరారు. ఆధునిక వ్యవసాయ పద్ధతులు, మార్కెట్ అవసరాలకు తగ్గట్టుగా సాగు చేసి అధిక లాభాలు గడించాలని సూచించారు.
