రాష్ట్రానికి రావాల్సిన రూ. 1,400 కోట్ల బకాయిలు విడుదల చేయాలని వినతి..
Paddy Procurement | తెలంగాణ రైతాంగ ప్రయోజనాల కోసం ముఖ్యమంత్రి ఎ. రేవంత్ రెడ్డి, పౌరసరఫరాల శాఖ మంత్రి ఉత్తమ్ కుమార్ రెడ్డి ఢిల్లీలో ముమ్మర ప్రయత్నాలు చేస్తున్నారు. శుక్రవారం కేంద్ర పౌరసరఫరాల శాఖ మంత్రి ప్రహ్లాద్ జోషితో భేటీ అయిన ముఖ్యమంత్రి బృందం, రాష్ట్రంలో పండిన ధాన్యం సేకరణ మరియు పెండింగ్ నిధుల విడుదలపై సుదీర్ఘంగా చర్చించారు.
Paddy Procurement : ముఖ్యాంశాలు
బాయిల్డ్ రైస్ సేకరణ: ఈ రబీ (యాసంగి) సీజన్లో తెలంగాణలో సుమారు 90 లక్షల మెట్రిక్ టన్నుల ధాన్యం ఉత్పత్తి కానుందని, అందులో 30 లక్షల మెట్రిక్ టన్నుల పార్ బాయిల్డ్ రైస్ను ఎఫ్సీఐ (FCI) ద్వారా సేకరించాలని కేంద్ర మంత్రికి విజ్ఞప్తి చేశారు.
48 గంటల్లో చెల్లింపులు: రాష్ట్రంలో రైతుల నుంచి ధాన్యం కొనుగోలు చేసిన 48 గంటల్లోనే కనీస మద్దతు ధర (MSP) నిధులను నేరుగా వారి ఖాతాల్లో జమ చేస్తున్నామని, ఈ ప్రక్రియను మరింత వేగవంతం చేసేందుకు కేంద్రం సహకరించాలని కోరారు.
రూ. 1,400 కోట్ల బకాయిలు: గత పదేళ్లుగా కేంద్రం నుంచి రాష్ట్రానికి రావాల్సిన సుమారు రూ. 1,400 కోట్ల పెండింగ్ నిధులను తక్షణమే విడుదల చేయాలని మంత్రి ఉత్తమ్ కుమార్ రెడ్డి డిమాండ్ చేశారు.
పోషకాహార పంపిణీ పథకం: పిల్లల్లో రక్తహీనత, పోషకాహార లోపాల నివారణకు పాఠశాలలు, హాస్టళ్లు, ఐసీడీఎస్ కేంద్రాల ద్వారా గతంలో ఇచ్చే పోషకాహార బియ్యం పంపిణీని నిలిపివేశారని, దానిని తక్షణమే పునఃప్రారంభించాలని కోరారు. ఈ సమావేశంలో ఢిల్లీలో రాష్ట్ర ప్రభుత్వ ప్రత్యేక ప్రతినిధి ఎపి జితేందర్ రెడ్డి, సెక్రటరీ కోఆర్డినేషన్ అద్వైత్ సింగ్ మరియు కేంద్ర పౌరసరఫరాల శాఖ అధికారులు పాల్గొన్నారు.
